कालिकोट । शुभकालिका गाउँपालिका वडा नं. २ र ३ का जोखिममा रहेका बालबालिका, महिला, एकल महिला तथा ज्येष्ठ नागरिकलाई लक्षित गर्दै चप्पल वितरण कार्यक्रम सम्पन्न भएको छ। विपन्न तथा आर्थिक रूपमा कमजोर समुदायलाई प्रत्यक्ष राहत पुर्याउने उद्देश्यले सञ्चालन गरिएको उक्त कार्यक्रमले स्थानीयस्तरमा सकारात्मक प्रभाव पारेको छ।
उक्त कार्यक्रम वडा नं. २ का युवा नेता तथा समाजसेवी प्रकाश बहादुर शाहीको आर्थिक सहयोगमा सम्पन्न भएको हो। साथै, शुभकालिका गाउँपालिका खेलकुद समिति अध्यक्ष तथा युवा नेता बिनोद बहादुर शाहीको पहल र नागरिक समाजका अगुवा तथा समाजसेवी पत्रकार छत्र रोका मगरको समन्वयमा कार्यक्रम सञ्चालन गरिएको हो।
अभियान अन्तर्गत गोठिमुला, राजबाडा, भाउसैन लगायतका बस्तीहरूमा प्रत्यक्ष घरदैलोमै पुगेर चप्पल वितरण गरिएको आयोजकहरूले जानकारी दिएका छन्। कार्यक्रमलाई प्रभावकारी बनाउन युवा अभियन्ता हेमन्त अधिकारी, हिक्मत अधिकारी लगायत अन्य स्थानीय युवाहरूको सक्रिय सहभागिता रहेको थियो।
समन्वयकर्ता छत्र रोका मगरले भने, “सानो सहयोगमार्फत पनि समुदायमा ठूलो सन्देश दिन सकिन्छ भन्ने विश्वासका साथ हामीले यो अभियान सञ्चालन गरेका हौँ। आगामी दिनमा पनि यस्ता सामाजिक कार्यलाई निरन्तरता दिने योजना छ।”
त्यसैगरी, युवा नेता बिनोद बहादुर शाहीले “वास्तविक आवश्यकतामा रहेका समुदायलाई सानो सहयोगले पनि दैनिक जीवनमा सहजता ल्याउन सक्छ भन्ने सोचका साथ कार्यक्रम सञ्चालन गरिएको हो,” भन्दै यस्ता अभियानलाई अझ विस्तार गर्नुपर्नेमा जोड दिए।
स्थानीयवासीहरूले कार्यक्रमप्रति आभार व्यक्त गरेका छन्। एक स्थानीय महिलाले भनिन्, “हामीजस्ता विपन्न परिवारका लागि यस्ता सहयोग अत्यन्त उपयोगी हुन्छन्। यसले हाम्रो दैनिकी सहज बनाएको छ।”
त्यस्तै, एक ज्येष्ठ नागरिकले “सामाजिक सहकार्य र सहयोगको संस्कारले समाजलाई बलियो बनाउँछ, यस्तो कार्य निरन्तर हुनुपर्छ,” भन्दै खुसी व्यक्त गरे।
यस प्रकारका सामाजिक अभियानहरूले समुदायमा सहकार्य, सहयोग र मानवीय भावनालाई थप मजबुत बनाउने विश्वास गरिएको छ। साथै, साना पहलहरूले पनि ठूलो परिवर्तन ल्याउन सक्छन् भन्ने सन्देश यस कार्यक्रमले प्रवाह गरेको छ।
