सुर्खेत । डोल्पा जिल्ला कारागारबाट सुरुङ खनेर फरार भएका आठ जना कैदीबन्दीमध्ये दुई जनालाई प्रहरीले रुकुम पश्चिमबाट पक्राउ गरेको छ। फरार कैदीको खोजीमा जुटेको प्रहरीले मंगलबार बिहान उनीहरूलाई बोलेरो जिपमा यात्रा गरिरहेको अवस्थामा नियन्त्रणमा लिएको हो।
पक्राउ पर्नेमा जबरजस्ती करणी मुद्दामा कैद भुक्तान गरिरहेका रुकुम पश्चिमको आठबिसकोट नगरपालिका–१० का ३२ वर्षीय रामबहादुर विक र सल्यानको कुमाख गाउँपालिका–५ का २८ वर्षीय रेशम राना रहेका छन्।
प्रदेश प्रहरी कार्यालयका प्रवक्ता एवं प्रहरी वरिष्ठ उपरीक्षक (एसएसपी) सन्तोषसिंह राठौरका अनुसार उनीहरूलाई आठबिसकोट नगरपालिका–६ दामाचौरस्थित खोली बगरबाट वडा नम्बर ९ राडीतर्फ जाँदै गरेको कर्णाली प्रदेश ०२–००१ च ०८३१ नम्बरको डबल क्याब बोलेरो जिपबाट पक्राउ गरिएको हो।
प्रहरीले चेकजाँच गर्ने क्रममा भाग्न खोजेपछि उनीहरूमाथि सोधपुछ गर्दा डोल्पा कारागारबाट फरार भएका कैदीबन्दी भएको खुलेको जनाएको छ। पक्राउ परेका दुवै जनालाई आवश्यक अनुसन्धान तथा कारबाहीका लागि प्रहरी चौकी गोतामकोटमा राखिएको छ।
