कालिकोट । जिल्लाको पञ्चदेब माध्यमिक विद्यालय, खाँडाचक्र नगरपालिका–१, कालिकोटको ४७औँ वार्षिक उत्सव तथा अभिभावक दिवस भव्य रूपमा सम्पन्न भएको छ।
विद्यालय व्यवस्थापन समितिका अध्यक्ष तथा नगरपालिकाका उपप्रमुख गणेश बहादुर शाहीको अध्यक्षतामा सम्पन्न कार्यक्रममा कालिकोट जिल्ला समन्वय समितिका प्रमुख धनजित बहादुर शाही प्रमुख अतिथि तथा पूर्व नगरप्रमुख जसि प्रसाद पाण्डे विशेष अतिथिका रूपमा सहभागी थिए। कार्यक्रममा अभिभावक, विद्यार्थी, शिक्षक तथा स्थानीय सरोकारवालाको उल्लेख्य उपस्थिति रहेको थियो।
आर्थिक अवस्था सुदृढ
विद्यालयद्वारा प्रस्तुत आर्थिक प्रतिवेदनअनुसार शैक्षिक सत्र २०८१/०८२ का लागि कुल आम्दानी ५ करोड ५८ लाख ५१ हजार ३ सय ४८ रुपैयाँ ७६ पैसा रहेको छ भने खर्च ३ करोड ३७ लाख ९ हजार २ सय ८४ रुपैयाँ ८९ पैसा भएको जनाइएको छ। हाल विभिन्न खातामा २ करोड १६ लाख ४० हजार ९ सय ५२ रुपैयाँ ८३ पैसा मौज्दात रहेको जानकारी दिइएको छ। यसले विद्यालयको वित्तीय अवस्था सुदृढ बन्दै गएको संकेत गरेको छ।
गुणस्तर सुधारमा जोड
अध्यक्ष शाहीले विद्यालयको शैक्षिक गुणस्तर अभिवृद्धिका लागि स्थानीय सरकार, शिक्षक र अभिभावकबीच सहकार्य अपरिहार्य रहेको बताउँदै आगामी दिनमा भौतिक तथा शैक्षिक पूर्वाधार विकासमा नगरपालिका प्रतिबद्ध रहने स्पष्ट पारे।
प्रमुख अतिथि शाहीले विद्यालयलाई जिल्लाकै उत्कृष्ट शैक्षिक संस्थामध्ये एक बनाउने लक्ष्यसहित योजनाबद्ध ढंगले अघि बढ्न आग्रह गर्दै गुणस्तरीय शिक्षा, अनुशासन र प्राविधिक शिक्षाको विस्तारमा जोड दिनुपर्ने बताए।
विशेष अतिथि पाण्डेले विद्यालयले विगतदेखि शैक्षिक क्षेत्रमा महत्वपूर्ण योगदान पुर्याउँदै आएको उल्लेख गर्दै समुदायको सक्रिय सहभागिताबाट अझ उत्कृष्ट उपलब्धि हासिल गर्न सकिने विश्वास व्यक्त गरे।
उपलब्धिमा वृद्धि
विद्यालयका प्रधानाध्यापक चन्द्र प्रसाद कोईरालाले वार्षिक प्रतिवेदन प्रस्तुत गर्दै शैक्षिक उपलब्धि दर ४५ प्रतिशतबाट बढाएर ५५ प्रतिशत पुर्याउन सफल भएको जानकारी दिए।
कार्यक्रममा विद्यार्थीहरूले आकर्षक सांस्कृतिक प्रस्तुति दिएका थिए भने उत्कृष्ट विद्यार्थी तथा शिक्षकलाई सम्मान गरिएको विद्यालय प्रशासनले जनाएको छ।
समग्रमा, ४७औँ वार्षिकोत्सवले विद्यालयको शैक्षिक, आर्थिक तथा संरचनागत प्रगतिलाई उजागर गर्नुका साथै आगामी दिनमा अझ उत्कृष्ट नतिजा हासिल गर्ने प्रतिबद्धता व्यक्त गरेको छ।
