बाजुरा । हिमाल र पहाडबीचको साँघुरो घुम्ती र जोखिमपूर्ण सडकमा फेरि एकपटक दुर्घटनाले आक्रान्त बनाएको छ। हुम्लाबाट सुर्खेततर्फ गइरहेको कर्णाली प्रदेश ०२००१ ख ०८९० नम्बरको यात्रुवाहक बस बिहीबार दिउँसो करिब १२ः११ बजे बाजुराको जगन्नाथ गाउँपालिका–३, बेर्मा बजार नजिकैको भलिया बगरमा दुर्घटनामा परेको हो।
बस अनियन्त्रित भई सडकबाट तल खस्दा तीन जना यात्रु घाइते भएका छन्। घाइतेहरूमा मुगु जिल्ला रारा छायानाथ नगरपालिका–३ का १८ वर्षीय विशाल बिक, दैलेख दुल्लु नगरपालिका–२ की दिपा सोनाम, र बाजुरा जगन्नाथ गाउँपालिका–६ की ४५ वर्षीया प्रेमकला दमाई रहेका छन्।
तीनै जनाको अवस्था सामान्य रहेको र उनीहरूलाई बेर्मा बजारस्थित गोपाल मेडिकलमा उपचार भइरहेको प्रहरीले जनाएको छ।
दुर्घटनाको बेला बसमा २३ जना यात्रु सवार थिए। बसका चालक सुर्खेत भेरीगंगा नगरपालिका–११ का दिपक बिक रहेका छन्। प्रारम्भिक अनुमान अनुसार तीव्र घुम्ती र सडकको साँघुरोपनाका कारण बस अनियन्त्रित भएको हुन सक्ने प्रहरीले बताएको छ।
कर्णाली प्रदेशका हिमाली जिल्ला हुम्ला, मुगु, बाजुरा र जुम्ला जोड्ने यो मार्ग देशकै सबैभन्दा कठिन र जोखिमपूर्ण सडकहरूमध्ये एक मानिन्छ। वर्षायाममा पहिरो र हिउँदमा हिउँका कारण सडक यात्रा निकै चुनौतीपूर्ण हुन्छ। स्थानीयहरूका अनुसार “यो बाटोमा हरेक यात्रु ढुक्कसँग गन्तव्य पुग्दा आफूलाई भाग्यशाली ठान्छन्।”
कर्णालीको विकासका लागि यो सडक जीवनरेखा सरह भए पनि यसको मर्मत र सुरक्षाका उपाय अझै पर्याप्त छैनन्। दुर्घटनापछि स्थानीयवासी र यात्रुहरूले सडक विस्तार र सुरक्षाका पूर्वतयारीमा सरकारको ध्यान केन्द्रित गर्न माग गरेका छन्।
