हुम्ला, असोज २४ – हुम्लाको चंखेली गाउँपालिकामा शुक्रबार बिहान एक जिप दुर्घटनामा परेपछि तीन जनाको ज्यान गएको छ भने छ जना घाइते भएका छन्।
जिल्ला प्रहरी कार्यालय हुम्लाका अनुसार कर्णाली प्रदेश ०२–००१ च १०९१ नम्बरको डबल क्याब जिप पिप्लाङतर्फ जाँदै गर्दा बिहान करिब ११ बजे दुर्घटनामा परेको हो।
दुर्घटनामा परी बसन्ति बुढा, उनका छोरा तथा मानबिर बुढाको घटनास्थलमै मृत्यु भएको प्रहरीले जनाएको छ। तीनैजना चंखेली गाउँपालिकाका स्थानीय बासिन्दा हुन्।
घाइतेमध्ये कैलाश शिरा, बहादुर लामा, महेन्द्र रोकाया, हंश बुढा, पार्वती बुढा र बिमला बुढालाई प्रारम्भिक उपचारका लागि नजिकको स्वास्थ्य संस्थामा लगिएको छ। केही घाइतेको अवस्था गम्भीर रहेकाले थप उपचारका लागि बाहिर लैजाने तयारी भइरहेको छ।
प्रहरीका अनुसार दुर्घटनाको कारणबारे थप अनुसन्धान भइरहेको छ।
