जुम्ला । जुम्लामा एक ज्येष्ठ नागरिक महिलाको शंकास्पद मृत्यु भएको घटना बाहिर आएको छ। कनकासुन्दरी गाउँपालिका–४, साहुँबाडा निवासी ७० वर्षीया महेश्वरा सुनार आफ्नै घरमा गम्भीर घाइते अवस्थामा भेटिएकी थिइन्। छिमेकीहरूले घटनाबारे जानकारी पाएपछि उनलाई उपचारका लागि कर्णाली स्वास्थ्य विज्ञान प्रतिष्ठान शिक्षण अस्पताल पुर्याइएको थियो। तर उपचारकै क्रममा बिहान करिब ९ः४५ बजे उनको मृत्यु भएको चिकित्सकले पुष्टि गरेका छन्।
प्रहरीका अनुसार मृतकको टाउको र आँखामा गम्भीर चोटपटक देखिएको छ, जसले घटनालाई अझै शंकास्पद बनाएको छ। प्रारम्भिक जानकारीअनुसार टाउकोमा धारिलो वस्तु प्रयोग गरी आक्रमण गरिएको हुन सक्ने आशंका गरिएको छ।
घटनापछि जिल्ला प्रशासन र प्रहरी सक्रिय रूपमा अनुसन्धानमा जुटेका छन्। प्रमुख जिल्ला अधिकारीको निर्देशनमा प्रहरी टोली घटनास्थल पुगेर प्रमाण संकलन तथा सत्यतथ्य पत्ता लगाउने कार्य अघि बढाइएको छ। दोषी पहिचान गरी कानुनी कारबाही गरिने प्रहरीले जनाएको छ।
यस घटनाले स्थानीयवासीमा त्रास र चिन्ता बढाएको छ भने सुरक्षित समाज निर्माणका विषयमा पुनः गम्भीर प्रश्न उठाएको छ।
