दैलेख । नेपालगञ्जमा चार महिना लामो उपचारपछि घर फर्किँदै गरेकी एक बिरामी सवार एम्बुलेन्स बुधबार बिहान दुर्घटना हुँदा ८ जना घाइते भएका छन्। दुर्घटनामा नौमूले गाउँपालिका–६ सल्लेरीकी ५५ वर्षीया भविसरा दर्लामी गम्भीर घाइते हुनुभएको छ।
मस्तिष्कघातको उपचारपछि शुभेच्छुकहरूको आर्थिक सहयोगमा घर फर्किँदै गर्नुभएकी भविसरा घर पुग्नै लाग्दा दुर्घटनामा पर्नुभएको हो। कर्णाली प्रदेश ०२–००१ झ ०१०६ नम्बरको नौमूले गाउँपालिकाको एम्बुलेन्स नौमूले गाउँपालिका–५ स्थित गजमाली भन्ने स्थानमा बुधबार बिहान दुर्घटनाग्रस्त भएको जिल्ला प्रहरी कार्यालय दैलेखले जनाएको छ।
दुर्घटनामा भविसराको टाउकोमा गम्भीर चोट लागेको छ भने सोही स्थानका ६५ वर्षीय कर्णबहादुर दर्लामीको छातिमा गम्भीर चोट लागेको छ। एम्बुलेन्स चालक नौमूले गाउँपालिका–५ सल्लेरी निवासी २६ वर्षीय इन्द्रबहादुर मगरलाई प्रहरीले नियन्त्रणमा लिएको छ।
दुर्घटनामा घाइते हुने अन्य व्यक्तिहरूमा ३५ वर्षीया पवित्रा सलामी, उहाँका ५ वर्षीय छोरा छविलाल सलामी, ३३ वर्षीय अमर सलामी, २६ वर्षीया गीता योगी, ३३ वर्षीय दिपेन्द्र योगी र ४० वर्षीया देवीसरा योगी रहेका छन्। उनीहरू सबै नौमूले गाउँपालिका–६ सल्लेरीका बासिन्दा हुन्।
घाइतेहरूको अवस्था र दुर्घटनाको कारणबारे थप अनुसन्धान भइरहेको प्रहरीले जनाएको छ।
