काठमाडौँ । काठमाडौँ महानगरपालिकाका मेयर बालेन्द्र साह (बालेन) फेरि एकपटक सामाजिक सञ्जालको केन्द्रबिन्दु बनेका छन् । गएराति फेसबुकमा उनले लेखेको एउटा विवादास्पद स्टाटसले अहिले राजनीतिक र सामाजिक वृत्तमा तहल्का मच्चाइरहेको छ ।
बालेनले उक्त स्टाटसमा भारत, चीन र अमेरिकाजस्ता ठूला मुलुकप्रति समेत अश्लील शब्द प्रयोग गर्दै आक्रोश पोखेका थिए । यत्तिमात्र होइन, उनले नेपाली कांग्रेस, नेकपा एमाले, माओवादी केन्द्र, रास्वपा र राप्रपाजस्ता ठूला राजनीतिक दलहरूको नामै उल्लेख गर्दै गालीगलौज गरेका थिए ।
पोस्ट सार्वजनिक भएको केही बेरमै उनले स्टाटस हटाए पनि त्यसको स्क्रिनसट सामाजिक सञ्जालभर फैलिसकेको छ । फलस्वरूप, अब उनको भाषा र व्यवहारप्रति तीव्र आलोचना भइरहेको छ ।
राजनीतिक विश्लेषकहरूले बालेनको यस्तो व्यवहारलाई “भावनामा आएको विस्फोट” र “राजनीतिक अस्थिरता” को संकेतका रूपमा व्याख्या गरेका छन् । पछिल्लो समय नयाँ दल खोल्ने कि रास्वपाबाटै अघि बढ्ने भन्ने दोधारमा रहेका बालेनले रास्वपालाई समेत गाली गरेर आफू त्यस दलसँग पनि टाढा पुगेको आभास दिएका छन् ।
यसबीच, सामाजिक सञ्जाल प्रयोगकर्ताहरूले मेयर साहले जनप्रतिनिधिको मर्यादाको ख्याल गर्नुपर्ने भन्दै तीव्र असन्तोष प्रकट गरिरहेका छन् । केहीले भने उनलाई “स्पष्ट बोल्ने साहसी नेता” का रूपमा पनि व्याख्या गरेका छन्, तर बहुसंख्यक आवाज भने अशोभनीय शब्दप्रयोगलाई अस्वीकार्य ठहर गर्दै “सार्वजनिक पदको इज्जत जोगाउन आग्रह” गरिरहेका छन् ।
