सुर्खेत । सुनसरीको इटहरी उपमहानगरपालिका–२ का २० वर्षीय युवराज निरौलाको प्रहरी कुटपिटबाट मृत्यु भएको भन्दै परिवारले प्रहरीमाथि गम्भीर आरोप लगाएका छन्। धरानस्थित तीनकुने प्रहरी चौकीमा चेकजाँचको क्रममा कुटपिटपछि उपचारका लागि कोशी अस्पताल, विराटनगर लगिएकोमा सोमबार राति उनको मृत्यु भएको हो।
साउन ९ गते बेलुकी करिब ८ बजे युवराज निरौला र उनका साथी दीपक कटुवाल २२, बेलुका नगरपालिका–३, उदयपुरका बासिन्दा, धरान जाँदै गर्दा चेकजाँचका लागि रोकिन पुगेका थिए। प्रहरीले लागू औषध सेवनको आशंकामा दुवैलाई नियन्त्रणमा लिएर सोधपुछ गरेको थियो।
मृतकका भाइ सन्तोष निरौलाका अनुसार सोधपुछकै क्रममा प्रहरीले युवराजमाथि निर्घात कुटपिट गरेका थिए। “छाती र टाउकोमा बुटले हानेर मार्ने गरि कुटपिट गरियो,” उनले गम्भीर आरोप लगाए।
घाइते अवस्थामा रहेका निरौलालाई तत्काल धरानस्थित बिपी कोइराला स्वास्थ्य विज्ञान प्रतिष्ठान लगिएको थियो, तर अवस्था गम्भीर भएपछि विराटनगरस्थित कोशी अस्पतालमा रिफर गरिएको थियो। उपचारकै क्रममा उनको मृत्यु भएको हो।
यस विषयमा इलाका प्रहरी कार्यालय धरानले औपचारिक प्रतिक्रिया दिएको छैन। यद्यपि, आन्तरिक अनुसन्धान प्रक्रिया अघि बढाइएको स्रोतले जनाएको छ।
प्रहरीको कुटपिटबाट युवाको मृत्यु भएको आरोपसँगै स्थानीयवासी र मानवअधिकारकर्मीहरूले घटनाको निष्पक्ष छानबिन र दोषीमाथि कारबाहीको माग गरेका छन्।
