सुर्खेत । नेपाली कांग्रेसको १५औँ महाधिवेशनअन्तर्गत वीरेन्द्रनगर नगरपालिका–३ को वडा अधिवेशन क्रियाशील सदस्यताको विवादबीच सम्पन्न भएको भन्दै असन्तुष्ट पक्षले गम्भीर आपत्ति जनाएको छ।
अधिवेशन स्थगित गर्न माग गर्दै निर्वाचन अधिकृतसमक्ष बिहानै लिखित निवेदन दिइएको भए पनि त्यसलाई बेवास्ता गर्दै निर्वाचन प्रक्रिया अघि बढाइएको असन्तुष्ट पक्षको आरोप छ। उनीहरूका अनुसार जिल्ला तहबाट समेत अधिवेशन रोक्न निर्णय भएको अवस्थामा सम्बन्धित सबै पक्षलाई जानकारी नदिई सीमित व्यक्तिको उपस्थितिमा पदाधिकारी घोषणा गर्दै अधिवेशन सम्पन्न गरिएको हो।
असन्तुष्ट पक्षले अनलाइनमार्फत क्रियाशील सदस्यताका लागि आवश्यक प्रक्रिया पूरा गरेका करिब ४०२ जनाको नाम वडा सभापतिले नियोजित रूपमा सूचीबाट हटाएको आरोप लगाएको छ। विशेषगरी युवा, दलित तथा महिलालाई क्रियाशील सदस्य बन्ने अवसरबाट वञ्चित गरिएको उनीहरूको दाबी छ।
क्रियाशील सदस्यताको विषय नै विवादित रहेको अवस्थामा अधिवेशन अघि बढाउँदा पार्टीको विधि, विधान र निर्वाचन प्रक्रियाको निष्पक्षतामाथि प्रश्न उठ्ने भन्दै असन्तुष्ट पक्षले तत्काल निर्वाचन प्रक्रिया रोक्न माग गरेको थियो। तर, उक्त मागको टुंगो नलाग्दै अधिवेशन सम्पन्न भएको उनीहरूको भनाइ छ।
यस विषयमा वडा कार्यसमितिका पदाधिकारी तथा सदस्य, जिल्ला कार्यसमिति सदस्य, पूर्व पदाधिकारी, पूर्व महाधिवेशन प्रतिनिधि, क्षेत्रीय प्रतिनिधि तथा भ्रातृ एवं शुभेच्छुक संस्थाका पदाधिकारीसहितले संयुक्त रूपमा निर्वाचन अधिकृतसमक्ष निवेदन दिएका थिए।
निवेदनमा वडा कार्यसमितिका उपसभापति महतबहादुर सिंह, हिमाल सिरपाइली, दशरथ मल्ल, कविराज थापा तथा १४औँ महाधिवेशनका वडा सभापति उम्मेदवार लालबहादुर शाही लगायतको हस्ताक्षर रहेको जनाइएको छ।
असन्तुष्ट पक्षले क्रियाशील सदस्यताको विषयमा निष्पक्ष छानबिन गरी योग्य सदस्यहरूको नामावली स्पष्ट र सार्वजनिक गरेपछि मात्रै वडा अधिवेशनको प्रक्रिया अघि बढाउनुपर्ने माग गरेको छ। सदस्यता विवाद समाधान नगरी गरिएको अधिवेशनले आगामी दिनमा थप विवाद निम्त्याउन सक्ने उनीहरूको भनाइ छ।
