सल्यान । नेपाल कम्युनिष्ट पार्टी (एमाले) कर्णाली प्रदेश कमिटीका अध्यक्ष गुलाबजंग शाह आगामी प्रतिनिधिसभा निर्वाचनका लागि सल्यान जिल्लाबाट एकल उम्मेदवारका रूपमा सिफारिस हुनुभएको छ ।
शुक्रबार सम्पन्न एमाले सल्यानको आठौँ पूर्ण बैठकले फागुन २१ गते हुने प्रतिनिधिसभा निर्वाचनका लागि शाहलाई सर्वसम्मत रूपमा उम्मेदवार सिफारिस गर्ने निर्णय गरेको हो । सल्यान जिल्लामा एक मात्र संघीय निर्वाचन क्षेत्र रहेको छ ।
एमाले सल्यानका अध्यक्ष भिमबहादुर सेनका अनुसार शाहको लामो राजनीतिक अनुभव, कर्णाली प्रदेशमा पार्टी नेतृत्वमा निर्वाह गरेको भूमिका तथा राष्ट्रिय राजनीतिमा पुर्याएको योगदानलाई आधार मानेर एकल सिफारिस गरिएको हो । “पार्टी संगठन सुदृढीकरणदेखि जनताको मुद्दा उठानसम्म उहाँको भूमिका प्रभावकारी रहँदै आएको छ,” सेनले बताउनुभयो ।
बैठकले पार्टीको भर्खरै सम्पन्न ११औँ महाधिवेशनको सन्देश जनस्तरसम्म पुर्याउने उद्देश्यले जिल्लाका सबै स्थानीय तहमा सन्देशसभा तथा विस्तारित बैठक आयोजना गर्ने निर्णयसमेत गरेको छ ।
