कालिकोट । कालिकोटको दुर्गम गाउँबाट उद्धार गरी सुर्खेत ल्याइँदै गर्दा नेपाली सेनाको हेलिकप्टरमै जन्मिएकी शिशुको अस्पताल पुग्नुअघि नै मृत्यु भएको छ। आमा भने अहिले कर्णाली प्रदेश अस्पतालमा स्वास्थ्यकर्मीको निगरानीमा रहेकी छिन्।
२० वर्षीया अबिसा खत्री, तिलागुफा नगरपालिका–९ की बासिन्दा, गम्भीर रक्तस्राव भएपछि सोमबार बिहान नेपाली सेनाको हेलिकप्टरमार्फत सुर्खेत ल्याइँदै थिइन्। उपचारका क्रममा उनी सुत्केरी व्यथाले च्यापिएपछि बिहान ९ बजेर ५० मिनेट जाँदा हेलिकप्टरमै शिशु जन्माएकी थिइन्।
वरिष्ठ नर्सिङ अधिकृत कल्पना थापाका अनुसार जन्मपछि शिशुले केही समय रोएको भनिए पनि अस्पताल पुग्दा जीवित थिएन। “हेलिकप्टरमै जन्मिएको शिशु अस्पताल आइपुग्दा कुनै जीवनचिन्ह थिएन,” उनले भनिन्। “चिकित्सकले जाँच गर्दा तत्काल मृत घोषणा गरिएको हो।”
थापाका अनुसार अबिसाको गर्भ केवल २४ हप्ता ६ दिनको मात्र थियो। यस्तो अवस्थामा जन्मिने शिशुको जीवनरक्षाको सम्भावना न्यून हुने बताइन्छ। त्यसमा पनि दुर्गम स्थान, आकस्मिक अवस्था र रक्तस्रावको समस्या भएकाले थप जोखिम बढेको चिकित्सकहरूको भनाइ छ।
अबिसालाई राति १ बजेदेखि नै रक्तस्राव सुरु भएको थियो। बिहानसम्म अवस्था गम्भीर भएपछि परिवारले उनलाई नजिकैको चिलखाया स्वास्थ्य संस्था लगेका थिए। त्यहाँ उपचार सम्भव नभएपछि उनलाई तत्काल सुर्खेत पठाइएको थियो।
कर्णाली प्रदेश अस्पतालका अनुसार शिशुको निधन भए पनि आमा अबिसाको अवस्था अहिले स्थिर र सामान्य छ। अस्पतालका चिकित्सकहरूको टोलीले उनलाई निरन्तर स्वास्थ्य परीक्षण गर्दै आएको जनाएको छ।
दुर्गम पहाडी जिल्लामा गर्भवती महिलाको स्वास्थ्य सेवामा पहुँच नहुँदा यस किसिमका जोखिमपूर्ण घटना बारम्बार हुने गरेका छन्। स्थानीय स्वास्थ्यकर्मीहरूले समयमै सुत्केरी सेवा र प्रसूति पूर्व सल्लाह प्रणाली सुदृढ गर्नुपर्ने सुझाव दिएका छन्।
