सल्यान । सल्यानको कपुरकोट गाउँपालिका–३ मा शनिबार राति भएको सडक दुर्घटनामा ज्यान गुमाएका तीन जनाको बाँफिकोट गाउँपालिकामा सामूहिक अन्त्येष्टि गरिएको छ।
दुर्घटनामा मृत्यु भएका वडा नम्बर ५ की ६८ वर्षीया पवि केसी, सोही ठाउँका २७ वर्षीय शशीधर केसी र वडा नम्बर ४ का २७ वर्षीय प्रकाश केसीलाई बाँफिकोट–४ को घुमाउरा घाटमा आइतबार दिनभर शोकाकुल वातावरणमा अन्त्येष्टि गरिएको हो। गाउँभरका स्थानीयवासी ठूलो संख्यामा घाटमा भेला भएर उनीहरूलाई श्रद्धाञ्जली अर्पण गरेका थिए।
लु २ ख ६५०२ नम्बरको फोर्स गाडी बाँफिकोटबाट दाङतर्फ जाँदै गर्दा कपुरकोट–३ मा दुर्घटनाग्रस्त बनेको थियो। गाडीमा एउटै परिवारका ४ जना सहित ५ जना सवार रहेका थिए। घटनास्थलमै तीन जनाको मृत्यु भएको थियो भने गम्भीर घाइते दुई जनाको अहिले कोहलपुरमा उपचार भइरहेको छ।
स्थानीयवासीका अनुसार दुर्घटना रातको समयमा भएको र सडकको अवस्था कमजोर रहेको प्राथमिक अनुमान छ। राजमार्ग हुँदै आवतजावत गर्ने गाडी चालकहरूले पनि उक्त स्थानलाई जोखिमपूर्ण मान्ने गरेको बताइएको छ।
दुर्घटनापछि मृतक परिवारमा शोक छाएको छ भने गाउँमा समेत शोकाकुल वातावरण छ। बाँफिकोट गाउँपालिकाका जनप्रतिनिधिहरूले पीडित परिवारलाई आवश्यक सहयोग गर्ने प्रतिबद्धता जनाएका छन्।
