काठमाडौँ । भ्रष्टाचार र सामाजिक सञ्जालमाथि सरकारले लगाएको प्रतिबन्धको विरोधमा नेपालका जेनजेड पुस्ताले देशव्यापी प्रदर्शन चर्काएका छन् । आइतबारदेखिको प्रदर्शनलाई प्रहरीले नियन्त्रण गर्ने क्रममा काठमाडौँको नयाँ बानेश्वरमा गोली चल्दा दुई जना प्रदर्शनकारीको मृत्यु भएको छ भने ८० भन्दा बढी घाइते भएका छन् । घाइतेमध्ये केहीको अवस्था गम्भीर रहेको बताइएको छ ।
राजधानी काठमाडौँसहित विराटनगर, वीरगञ्ज, भरतपुर, पोखरा, बुटवल, नेपालगञ्जलगायत प्रमुख सहर र विभिन्न स्थानमा युवाहरू सडकमा उत्रिएका छन् । प्रदर्शन नियन्त्रणका लागि प्रशासनले काठमाडौँ र पोखराका संवेदनशील क्षेत्रमा कर्फ्यु आदेश जारी गरेको छ भने अन्य केही सहरमा निषेधाज्ञा लगाइएको छ ।
सरकारको सामाजिक सञ्जाल बन्द गर्ने निर्णय र बढ्दो भ्रष्टाचारप्रति असन्तुष्ट भएका युवाहरूले सडकमा उत्रिएर “समान अवसर, स्वतन्त्र अभिव्यक्ति र भ्रष्टाचारविरुद्ध शून्य सहिष्णुता” जस्ता नारा दिएका छन् ।
यसबीच, प्रधानमन्त्री केपी शर्मा ओलीले सोमबार साँझ ६ बजेका लागि मन्त्रिपरिषद् बैठक बोलाएका छन् । बैठक प्रधानमन्त्रीको सरकारी निवास बालुवाटारमा बस्नेछ । बैठकमा मुलुकभर फैलिएको आन्दोलन, सुरक्षास्थिती र अगाडिका कदमबारे छलफल हुने बुझिएको छ ।
उता, नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ र नेकपा( एकिकृत समाजवादी) पार्टी का अध्यक्ष माधव कुमार नेपाल ले जेनजेड युवाहरूले उठाएका माग तत्काल सम्बोधन गर्न सरकारसँग आग्रह गरेका छन् । “युवापुस्ताको आवाज सुन्न ढिलाइ गर्नु मुलुकको लागि अझ ठूलो संकट निम्त्याउने खतरा हुन्छ” भन्दै माग पूरा गर्न जोड दिएका छन् ।
यस घटनापछि देशभरको राजनीतिक वातावरण थप तङ्गिन पुगेको छ भने विभिन्न नागरिक समाजका प्रतिनिधि, मानवअधिकार संगठन र अन्तर्राष्ट्रिय समुदायले पनि गम्भीर चासो व्यक्त गरेका छन् ।
