कालिकोट । जिल्लाको ताडी गाउँमा श्रीकृष्ण जन्माष्टमीको अवसरमा यो वर्ष पनि परम्परागत लाखे जात्रा धुमधामका साथ सुरु भएको छ। केही वर्षअघिदेखि स्थानीय युवाहरूको पहलमा सुरु गरिएको यो जात्रा यसपटक पनि त्यही जोश र उत्साहका साथ युवाहरूले सुरु गरेका हुन्।
विशेषतः, यस जात्राको संरक्षण र व्यवस्थापनमा वडा सरकारको चासो नदेखिनु र औपचारिक जिम्मेवारी नलिनु स्थानीयबीच आलोचनाको विषय बनेको छ। सांस्कृतिक सम्पदा जोगाउने जिम्मेवारी सरकारी निकायको पनि भएको भन्दै केही बासिन्दाले असन्तुष्टि व्यक्त गरेका छन्।
युवाहरूको नेतृत्वमा सुरु भएको यस लाखे जात्राले आगामी दिनमा ताडी गाउँ मात्र नभई सम्पूर्ण कालिकोट जिल्लाको मौलिकता, सांस्कृतिक पहिचान र सामुदायिक एकतालाई अझ मजबुत बनाउने विश्वास लिइएको छ। यस किसिमका सांस्कृतिक पर्वले नयाँ पुस्तामा परम्पराप्रतिको गर्व र लगाव बढाउने अपेक्षा गरिएको छ ।
