काठमाडौं । नेपाल प्रिमियर लिग (एनपीएल) सिजन–२ को उपाधि लुम्बिनी लायन्सले जित्दै नयाँ इतिहास रचेको छ । रोमाञ्चक फाइनलमा सुदूरपश्चिम रोयल्सलाई ६ विकेटले पराजित गर्दै लुम्बिनीले पहिलो पटक एनपीएलको ट्रफी उचालेको हो ।
सुदूरपश्चिमले दिएको ८६ रनको सामान्य लक्ष्य लुम्बिनीले नवौँ ओभरको अन्तिम बलमै चार विकेट गुमाएर पूरा गर्यो । बलिङ र ब्याटिङ दुवै पक्षमा सन्तुलित प्रदर्शन गर्दै लुम्बिनीले फाइनलमा दबाबलाई अवसरमा बदल्न सफल भयो ।
लगातार दोस्रो पटक फाइनलमा पुगे पनि सुदूरपश्चिम रोयल्सको उपाधि जित्ने सपना भने फेरि अधुरै रह्यो । पहिलो संस्करणमा जनकपुर बोल्ट्ससँग पराजित भएको सुदूरपश्चिम यसपटक पनि उपविजेतामै सीमित हुन पुग्यो ।
प्रतियोगिताको सुरुवात उत्साहजनक रहे पनि सुदूरपश्चिमको ब्याटिङ फाइनलमा कमजोर देखियो । टस जितेर पहिले ब्याटिङ गरेको टोली १९ दशमलव एक ओभरमै ८५ रनमा समेटियो । ईशान पाण्डेले ५१ बल खेलेर बनाएको ३३ रन बाहेक अन्य ब्याट्सम्यानले अपेक्षित योगदान दिन सकेनन् ।
लुम्बिनीका बलरहरूले सुरुदेखि नै दबाब सिर्जना गर्दै सुदूरपश्चिमलाई ठूलो स्कोर बनाउन दिएनन् । कसीएको बलिङकै कारण लुम्बिनीले सहज लक्ष्य पाएको थियो ।
जवाफमा लुम्बिनीका ओपनर दिनेश अधिकारीले आत्मविश्वासपूर्ण ब्याटिङ गर्दै ४२ रन बनाएर जितको आधार तयार गरे । डार्सी सर्टले १३, कप्तान रोहित पौडेलले १८ रनको योगदान दिए । अन्त्यमा निरोशन डिक्वेला (११) र दिलिप नाथ (१) अविजित रहँदै टोलीलाई ऐतिहासिक जित दिलाए ।
यो उपाधि लुम्बिनी लायन्सका लागि अझ विशेष रह्यो, किनकि प्रतियोगिताको सुरुवातमा लगातार तीन खेल हार्दै दबाबमा परेको टोलीले त्यसपछि लगातार जित निकाल्दै उत्कृष्ट कमब्याक गरेको थियो । संघर्ष, धैर्य र टिमवर्कको उदाहरण प्रस्तुत गर्दै लुम्बिनीले अन्ततः एनपीएल सिजन–२ को च्याम्पियन बन्ने गौरव हासिल गर्यो ।
