केपि सर्मा ओलि को भनाई
आज संविधान दिवस हो। हाम्रो ७० वर्ष लामो संघर्षको परिणाम स्वरूप आज हामीसँग आफ्नै नेतृत्वमा निर्वाचित संविधानसभाले बनाएको संविधान छ। लोकतान्त्रिक गणतन्त्र, संघीय समावेशी व्यवस्था र जनताका अधिकार—यी सबै यस संविधानले सुनिश्चित गरेको हो।
संविधान निर्माणका चुनौतीहरू तपाईंहरूको स्मृतिमा ताजै छन्। नाकाबन्दी, राष्ट्रिय सार्वभौमसत्तामा आएका खतराहरू—यी सबैलाई पार गर्दै संविधान जारी भएको थियो। त्यसैले नेपालको संविधान केवल कागजमा छैन, यो हाम्रो भविष्यको ढाँचा, हाम्रो स्वतन्त्रताको सुरक्षा कवच हो।
संविधान जारी भएदेखि हामीले देशलाई मजबुत बनाउँदै अगाडि बढाएका थियौं। भूपरिवेष्ठित भूभाग जोड्ने यातायात संरचना बनाउँदै थियौं, उत्तरी छिमेकीसँग पारवहन सम्झौता गर्दै थियौं, विकासका आधारभूत संरचनाहरू स्थापनामा अघि बढिरहेका थियौं। अर्थतन्त्र समृद्धि तर्फ बढ्दै थियो।
तर गत साता जेन्(जी आन्दोलनको नाममा शान्तिपूर्ण प्रदर्शन भनि आह्वान गरिएको भए पनि, घुसपैठकारीहरूले हिंसा मच्चाए। हाम्रा युवाहरूको ज्यान गयो। मैले स्पष्ट भन्न चाहन्छु, सरकारले प्रदर्शनकारीलाई गोली हान्न आदेश दिएको थिएन। स्वचालित हतियार प्रयोगबाट भएको घटनाको छानबिन हुनैपर्छ। दिवंगत युवाहरूप्रति श्रद्धाञ्जली, घाइतेहरूका शीघ्र स्वास्थ्य लाभको कामना गर्दछु।
हामी अहिले संविधानमाथि ठूलो आक्रमणको सामना गर्दैछौँ। सिंहदरबार जलाइयो, नेपालको नक्सा नष्ट गर्न खोजियो, जनप्रतिनिधि संस्था, न्यायालय, व्यापारिक प्रतिष्ठान, राजनीतिक दलका कार्यालय र व्यक्तिगत सम्पत्ति क्षतिग्रस्त बनाइयो। यी सबै घटनाको पछाडि षड्यन्त्र रहेको छ, तर सत्य समयले आफैं प्रकट गर्नेछ।
हामीले इतिहासबाट सिक्नुपर्छ। हाम्रा युवाहरूले भोगेका बलिदान, हाम्रो सीमाना रक्षा, हाम्रो स्वतन्त्रता—यी सबैको मूल्य बुझ्नुपर्छ। असन्तोष फैलाउने र विघटन गर्नेहरूलाई समयले आफ्नै उत्तर दिनेछ।
मेरो सबैमा अपील छ—हामी सबै एकजुट होऔं। हाम्रो सार्वभौमसत्ता हाम्रो अस्तित्व हो। संविधान हाम्रो स्वतन्त्रताको कवच हो। हाम्रो एकताले मात्र देशलाई संकटबाट उठाउन सक्छ।
