जुम्ला । जुम्ला जिल्ला फुटबल संघले आयोजना गरेको यू–१४ अन्तरविद्यालय स्तरीय फुटबल प्रतियोगिता मंगलबार भव्य समापन भयो। हप्तौँदेखि बालबालिकाको उत्साहले रंगिएको मैदान अन्ततः चन्दननाथ नमुना माध्यमिक विद्यालयको खुशीको आवाजले गुन्जायमान बन्यो।
फाइनल खेलमा चन्दननाथले जेआर कर्णाली बोर्डिङ स्कुललाई ३–० ले हराउँदै छात्रतर्फको उपाधि आफ्नो नाममा लेखाएको हो। खेलको सुरुवातमै आक्रामक देखिएको चन्दननाथले पहिलो हाफमै दुई गोल गर्दै निर्णायक दबाब बनायो। दोस्रो हाफमा थपिएको अर्को गोलले जित सुनिश्चित गर्यो। जेआर कर्णालीले खेलमा उत्कृष्ट प्रयास त गर्यो, तर गोलको रूपमा परिणत गर्न नसक्दा उपविजेतामै सीमित रहनुपर्यो। पाएको पेनाल्टी पनि गोलमा परिणत गर्न नसक्दा खेलको मोड बदल्न सकेन।
यो प्रतियोगिता केवल फुटबल मात्र थिएन, जिल्लाभरका विद्यालयबीचको प्रतिस्पर्धा, मित्रता र प्रतिभा प्रदर्शनको अवसर पनि थियो। छात्रतर्फ १४ टिम सहभागी भएका थिए भने छात्रातर्फ १० टिमसँगै कुल २४ टिमले मैदान तताएका थिए।
छात्रातर्फको उपाधि भने सरस्वती मावि रिनिले जित्न सफल भयो। जेआर कर्णाली बोर्डिङ, दुर्भाग्यवश, छात्रा र छात्र दुवै फाइनलमा पुगे पनि दुवैमा उपविजेतामै सीमित भयो।
फाइनल खेल संविधान दिवसको अवसर पारेर आयोजना गरिएको थियो। सो अवसरमा जिल्ला समन्वय समिति जुम्लाका प्रमुख गौरीनन्द आचार्य, प्रमुख जिल्ला अधिकारी केदारनाथ शर्मा लगायतका व्यक्तित्वहरूको विशेष उपस्थिति थियो।
पुरस्कार वितरण कार्यक्रममा एन्फा जुम्लाका अध्यक्ष भरत बहादुर बुढाथोकीले बालबालिकाको उत्साह देख्दा हर्ष व्यक्त गर्दै भविष्यमा अझ संगठित र व्यावसायिक प्रतियोगिता गराउने प्रतिबद्धता व्यक्त गरे। उनका अनुसार, विजेता तथा उपविजेता टिमलाई ट्रफी, मेडल र प्रमाणपत्र वितरण गरिएको थियो।
फाइनल खेलले जुम्लामा बालबालिकाको फुटबलप्रतिको आकर्षण र सम्भावनालाई झन् प्रष्ट पारेको छ। तर, खेलमैदानमा धेरै उत्साह भए पनि आधारभूत फुटबल ज्ञान र तालिममा अझ काम गर्नुपर्ने देखिएको आयोजक तथा शिक्षकहरूले बताएका छन्। उनीहरूको भनाइमा विद्यालयका ‘गेम टिचर’हरूले अझ धेरै समय र सीप बालबालिकालाई दिन सकेमा जुम्लाबाट भविष्यका राष्ट्रिय खेलाडीहरू निस्कन सक्नेछन्।
