बाँके ।बाँकेमा खसी किन्ने विषयमा भएको सामान्य विवादले उग्र रूप लिएपछि एक जनाको ज्यान गएको छ।
नेपालगन्ज उपमहानगरपालिका–५ का ५२ वर्षीय जाबिद अली बेहनाको शुक्रबार बिहान खसी किन्ने क्रममा दुई समूहबीचको झडपमा परी मृत्यु भएको जिल्ला प्रहरी कार्यालय बाँकेले पुष्टि गरेको छ।
प्रहरीका अनुसार जाबिदले किन्न तय गरेको खसी अर्का व्यक्तिले लैजान खोजेपछि विवाद सुरु भएको थियो। सोही विवाद ढुंगा हानाहानमा परिणत भएको र ढुंगा लागेर गम्भीर घाइते भएका जाबिदलाई उपचारका लागि अस्पताल पुर्याइए पनि दिउँसो साढे २ बजेतिर उनको मृत्यु भएको हो।
घटनामा संलग्न रहेको आशंकामा प्रहरीले चार जनालाई नियन्त्रणमा लिई अनुसन्धान अघि बढाएको प्रवक्ता डिएसपी दीपक पातलीले जानकारी दिएका छन्।
स्थानीयले सामान्य व्यापारिक लेनदेनलाई लिएर ज्यान जानेसम्मको घटना हुनु दुःखद भएको बताएका छन्। प्रहरीले घटनाबारे थप विवरण संकलन गर्दै निष्पक्ष छानबिन हुने आश्वासन दिएको छ।
