सुर्खेत । सुर्खेत–नेपालगञ्ज सडकखण्डको भेरीगंगा नगरपालिका–५, एमालेमोड नजिक मंगलबार दिउँसो भएको सवारी दुर्घटनामा ६ जना घाइते भएका छन्।
करिब दिउँसो १:४५ बजे नेपालगञ्जतर्फ गइरहेको क.प्र.०२–००१ ख ०९२२ नम्बरको फोर्स गाडी र विपरीत दिशाबाट आउँदै गरेको भे १ प १६८५ नम्बरको मिनि ट्रक एक आपसमा ठोक्किँदा दुर्घटना भएको हो। ठोक्किएपछि फोर्स गाडीका चालकसहित यात्रुहरू घाइते भएका छन्।
दुर्घटनापछि प्रहरी चौकी बबईका प्रहरी सहायक निरीक्षक हरीबहादुर तिरुवाको कमाण्डमा खटिएको टोलीले स्थानीयवासीको सहयोगमा तत्काल उद्धार कार्य सम्पन्न गरेको थियो। घाइतेहरूलाई प्राथमिक उपचारपछि थप उपचारका लागि कोहलपुर मेडिकल कलेज पठाइएको इलाका प्रहरी कार्यालय बबईले जनाएको छ।
प्रहरीका अनुसार घाइतेहरूको विस्तृत परिचय खुल्न बाँकी छ। यद्यपि, उनीहरूको अवस्था सामान्यदेखि मध्यम खालको देखिएको र चिकित्सकको निगरानीमा राखिएको बताइएको छ।
यसैबीच, दुर्घटनामा संलग्न मिनि ट्रक र त्यसका चालकलाई नियन्त्रणमा लिइएको छ। ट्राफिक प्रहरीका अनुसार घटनापछि सडकमा कुनै अवरोध नदेखिएको र सवारी आवागमन सामान्य रहेको छ।
स्थानीयले उक्त सडकखण्डमा सवारीको उच्च गति र अनियन्त्रित ओभरटेकिङका कारण पटक–पटक दुर्घटना हुने गरेको बताएका छन्। उनीहरूले दुर्घटना रोकथामका लागि सम्बन्धित निकायले तत्काल आवश्यक पहल गर्न माग गरेका छन्।
