दैलेख । दैलेखमा करेन्ट लागेर मृत्यु भएका नगेन्द्र माझीका आफन्तले विद्युतले क्षतीपूर्ती दिने सहमतिमा अवरुद्ध गरिएको कर्णाली राजमार्ग सुचारु भएको छ ।
राकम कर्णालीमा करेन्ट लागेर माझीको आइतबार साँझ मृत्यु भएपछि आफन्तले आज विहानैबाट कर्णाली राजमार्ग अवरुद्ध गरेका थिए । नेपाल विद्युत प्राधिकरण कालिकोट, प्रहरी र पीडित परिवारसँगको सहमतिमा बन्द भएको राजमार्ग सञ्चालनमा आएको ईलाका प्रहरी कार्यालय दुल्लु दैलेखका प्रहरी निरीक्षक कृष्णबहादुर खड्काले बताउनुभयो । सहमतिमा मृतक परिवारका एक सदस्यलाई रोजगारी दिने र कानुनअनुसार पाउने क्षतीपूर्तीमध्य एक लाख काजकिरियाका लागि रकम उपलव्ध गराउनेसमेत सहमति भएको उहाँको भनाई छ ।
पीडित परिवारसँग सहमति भएसँगै सोमबार विहानैबाट राकम कर्णाली बजारमा अवरुद्ध राजमार्ग सञ्चालनमा आएको छ । आठबिस नगरपालिका—४, राकमका २९ वर्षीय माझी आइतबार साँझ घाँस काट्ने क्रममा करेन्ट लागेको थियो । माझि चढेको रुखमा विद्युतको तारले छोएको र करेन्ट प्रवाह हुँदा उनको घटनास्थलमै मृत्यु भएको खड्काले बताउनुभयो । मृतक माझीको शव पोष्टमार्टमका लागि दुल्लु अस्पताल पुराईयको छ ।
