काठमाडौं । जनमत पार्टीसँगको बहुप्रतीक्षित एकता घोषणाका लागि काठमाडौँको प्रज्ञा भवन पुगेका नागरिक उन्मुक्ति पार्टी (नाउपा) का संरक्षक रेशम चौधरी बुधबार अपरान्ह सुरक्षाकर्मीले गिरफ्तार गरेका छन्। सादा पोशाकमा रहेका प्रहरीले चौधरीलाई कार्यक्रम स्थलबाटै नियन्त्रणमा लिएको पुष्टि भएको छ।
एकता घोषणा कार्यक्रम भर्खरै सुरू हुन लागेको बेला चौधरी प्रज्ञा भवन प्रवेश गरेसँगै केही सुरक्षाकर्मीहरू अचानक प्रवेश गर्दै उनलाई घेरेका थिए। केही क्षणको हलचलपछि उनलाई प्रहरीको सवारी साधनमार्फत भद्रकालीस्थित प्रहरी परिसरतर्फ लगिएको हो।
घटनाबारे प्रतिक्रिया दिँदै नाउपा अध्यक्ष रञ्जिता श्रेष्ठले चौधरी पक्राउ परेको कुरा आफूले पनि सञ्चार माध्यमबाट थाहा पाएको बताइन्। “हामी यसबारे बुझ्ने प्रयासमा छौँ, आधिकारिक जानकारी आउन बाँकी छ,” उनले संक्षिप्त प्रतिक्रिया दिइन्।
एकातर्फ मधेसमा बलियो उपस्थिति बनाएका दुई दलबीचको सम्भावित ऐतिहासिक एकता हुँदै थियो भने अर्कातर्फ त्यसकै पूर्वसन्ध्यामा भएको यो गिरफ्तारीले नयाँ राजनीतिक तरंग उत्पन्न गराएको छ।
राजनीतिक प्रेक्षकहरूले यो घटनालाई शंकास्पद रूपमा लिएका छन्। एकातर्फ अदालतबाट छुटिसकेका चौधरी, अर्कातर्फ उनले नेतृत्व गरिरहेको दलसँग दोस्रो ठूलो मधेसी दल जनमत पार्टीबीचको एकता प्रक्रिया यी दुवैलाई लक्षित गरेर सत्ता पक्षले दबाब सिर्जना गर्न खोजेको अनुमान पनि गरिँदैछ।
