सुर्खेत । वीरेन्द्रनगर नगरपालिका वडा नम्बर २ को कार्यालय अगाडिको सडक खण्डमा मोटरसाइकल र स्कुटी आपसमा ठोक्किँदा एक जनाको ज्यान गएको छ। दुर्घटनामा मृत्यु हुनेमा कालिकोटका उदयमान पत्रकार एवं प्रेस सेन्टर नेपाल कालिकोट अध्यक्ष तथा रेडियो तिला आवाज कालिकोटका संचालक वीरेन्द्र आचार्य रहेका छन्।
मुलपानीबाट भुरेली तर्फ जाँदै गरेका २३ वर्षीय यामबहादुर शाहीले चलाएको कर्णाली प्रदेश ०२००३ प १७४४ नम्बरको मोटरसाइकल र ३४ वर्षीय आचार्यले चलाएको लुम्बिनी प्रदेश ३६ प ३८८६ नम्बरको स्कुटी एक–अर्कामा ठोक्किएको सुर्खेत प्रहरीले जनाएको छ।
दुर्घटनापछि गम्भीर घाइते भएका सुर्खेत, वीरेन्द्रनगर–१ बसोबास गर्दै आएका आचार्यलाई उपचारका लागि प्रदेश अस्पताल पुर्याइएको थियो। तर, उपचारका क्रममा उहाँको निधन भएको प्रहरीले पुष्टि गरेको छ।
मोटरसाइकल चालक शाहीको अवस्था मध्यम रहेको र उनको टाउको तथा शरीरका विभिन्न भागमा चोट लागेको प्रहरीले जानकारी दिएको छ। उनको सुर्खेतमै उपचार भइरहेको छ।
परिवार शोकमा, कालिकोटबासी मर्माहत
सक्रिय युवा पत्रकार र सामाजिक अभियन्ताका रूपमा परिचित आचार्यको असामयिक निधनले कालिकोट मात्र नभई कर्णालीका सञ्चारकर्मी समुदाय नै स्तब्ध भएको छ। घरमा श्रीमती, विद्यालयमा अध्ययनरत छोरा र छोरी रहेका छन्। परिवारका सबै सदस्यहरू अहिले सुर्खेतमै छन् र अत्यन्त शोकाकुल अवस्थामा छन्।
उनको निधनले कालिकोटमा आज ‘कालो दिन’ जस्तै महसुस भएको स्थानीयहरूले बताएका छन्। समाचार उत्पादनदेखि सामाजिक सरोकारका मुद्दाहरूमा अग्रसर रहँदै आएका आचार्यको योगदानलाई कर्णालीका पत्रकारहरूले स्मरण गरेका छन्।
घटना बारे थप अनुसन्धान भइरहेकोे प्रहरीको भनाइ छ ।
