सुर्खेत। नेपाल आयल निगमले शनिबारदेखि लागू हुनेगरी पेट्रोलियम पदार्थको खुद्रा मूल्य समायोजन गरेको छ। नयाँ मूल्यसूचीअनुसार पेट्रोलको भाउ बढेको छ भने डिजेल र मट्टितेलमा केही राहत दिइएको छ।
निगमका अनुसार भारतको इन्डियन आयल कर्पोरेशन (IOC) बाट प्राप्त नवीनतम मूल्य सूचीका आधारमा पेट्रोलको मूल्य प्रतिलिटर दुई रुपैयाँले बढाइएको हो। यससँगै उपभोक्ताले अब प्रतिलिटर पेट्रोल किन्दा अघिल्लो मूल्यभन्दा बढी तिर्नुपर्ने भएको छ। त्यस्तै, डिजेल र मट्टितेल भने प्रतिलिटर एक रुपैयाँले सस्तो भएका छन्। निगमका अनुसार नयाँ मूल्य शनिबार राति १२ बजेदेखि लागू हुनेछ।
पेट्रोलियम पदार्थको अन्तर्राष्ट्रिय मूल्यमा हुने उतारचढावसँगै निगमले हरेक १५ दिनमा मूल्य समायोजन गर्दै आएको छ। मूल्य बढ्दा उपभोक्ताको दैनिक खर्चमा थप बोझ पर्ने गरेको छ भने घट्दा आंशिक राहत महसुस हुने गरेको छ। निगमले मूल्य समायोजनबारे उपभोक्तालाई सहजरूपमा जानकारी गराउन र मूल्य निर्धारण पारदर्शी बनाउन निरन्तर प्रयास भइरहेको दाबी गरेको छ।
