सुर्खेत। कर्णाली प्रदेश सरकारले आर्थिक वर्ष २०८१८२ मा सशस्त्र द्वन्द्वका सहिद परिवार र घाइतेहरूलाई राहतस्वरूप ९ करोड ६९ लाख ८४ हजार रुपैयाँ भत्ता वितरण गरेको छ।
आन्तरिक मामिला तथा कानुन मन्त्रालयका अनुसार, ४ हजार ४१ जना लाभान्वित यस योजनाबाट प्रदेशभर लाभान्वित भएका छन्।
योजनाअन्तर्गत २ हजार १२१ जना सहिद तथा बेपत्ता व्यक्तिका परिवार र १ हजार ९२० जना द्वन्द्व घाइतेले वार्षिक भत्ता प्राप्त गरेका छन्। सहिद परिवारका लागि ५ करोड ९ लाख ४ हजार र घाइतेहरूका लागि ४ करोड ६० लाख ८० हजार रुपैयाँ वितरण गरिएको मन्त्रालयका सूचना अधिकारी तुलसीप्रसाद आचार्यले जानकारी दिए।
आचार्यका अनुसार, प्रत्येक लाभान्वित व्यक्तिलाई मासिक २ हजार रुपैयाँका दरले वार्षिक २४ हजार रुपैयाँ प्रदान गरिएको हो।
भत्ताले द्वन्द्वको चोट बिसाउने प्रयासका साथ, सहिद परिवारप्रति सम्मान र घाइतेहरूको जीवनयापनमा सहयोग पुर्याउने उद्देश्य बोकेको मन्त्रालयको भनाइ छ।
प्रदेशका सबै १० वटै जिल्लामा कार्यक्रम कार्यान्वयन भए पनि कालिकोट र सल्यान जिल्ला यस योजनाबाट सबैभन्दा बढी लाभ पाउनेमा परेका छन्।
सल्यानको बागचौर नगरपालिका एक्लैले ७१ लाख ५२ हजार रुपैयाँ पाएको छ, जहाँ २९८ जना लाभग्राही (९४७ सहिद परिवार र २५१ घाइते) रहेका छन्।
यस कार्यक्रममार्फत प्रदेश सरकारले द्वन्द्वपीडितहरूको पीडामा केही राहत पुर्याउने र उनीहरूलाई राज्यले बिर्सिएको छैन भन्ने अनुभूति दिलाउने प्रयास गरेको छ।
सरकारको विश्वास छ—साना ठूला यस्ता राहत कार्यक्रमहरूले पीडित समुदायको सामाजिक–आर्थिक पुनर्स्थापनामा सकारात्मक असर पार्नेछ।
