जुम्ला । जुम्लाको कनकासुन्दरी गाउँपालिकाले शिक्षकलाई प्रत्येक दिन ५० रुपैयाँ खाजा खर्चस्वरुप प्रदान गरिरहेको छ । गत असार महिनादेखि शिक्षकलाई खाजा खर्चका लागि ५० रुपैयाँ दिन थालिएको हो ।
विद्यालयमा रहेका शिक्षक, कार्यालय सहयोगी र कर्मचारीलाई खाजा खर्चको प्रबन्ध गरिएको गाउँपालिका अध्यक्ष दामोदरप्रसाद आचार्यले जानकारी दिए । उनका अनुसार हरेक विद्यालयका प्रधानाध्यापकलाई प्रशासनिक भत्ताको व्यवस्थासमेत गरिएको छ । माध्यमिक तहमा ५ सय रुपैयाँ, आधारभूत तहमा २ सय ५० र प्राथमिक तहमा २ सय रुपैयाँ प्रशासनिक खर्च उपलब्ध गराइएको छ । कनकासुन्दरीमा २७ विद्यालय छन् । ४ सय ३३ जना शिक्षक कर्मचारी रहेका छन । उनीहरु सबैले खाजा खर्च पाइरहेका छन् । २७ जना प्रधानाध्यापकले प्रशासनिक खर्च पाइरहेका छन् । गाउँपालिका अध्यक्ष आचार्यले शिक्षकहरुको मनोबल उच्च बनाइराख्न खाजा खर्चको व्यवस्था गरिएको बताएका छन् । जबसम्म गुणस्तरीय शिक्षा प्रदान गर्न सकिँदैन, तबसम्म दक्ष जनशक्ति उत्पादन गरेर अघि बढ्न सकिँदैन, उनले भने, शिक्षकहरुमा उत्साह छाओस् भनेर यो व्यवस्था गर्यौं । विद्यार्थीले दिवा खाजा खाए पनि शिक्षकले दिनभर भोकै पढाउनुपर्ने बाध्यता रहेको उनले बताए । पालिकाले विद्यालय स्तरमा गहन अध्ययन गरेर खाजा खर्चको व्यवस्थापन गरेको उनको भनाइ छ ।
विद्यालयमा गुणस्तर कायम गर्न पटकपटक अनुगमन हुने गरेको छ । पहिलो चरणमा अनुगमन गर्दा शिक्षकहरुले पनि समस्या भोगिरहेको देखिएपछि पालिकाले खाजा खर्च दिने गरेको हो । पहिले शिक्षकहरु विद्यालय नजाने, ४५ मिनेट पनि नपढाउने समस्या थियो । हरेक बस्तीमा अभिभावक शिक्षा दियौं । शिक्षकलाई खाजा खर्चको व्यवस्था गर्यौं, शिक्षा शाखामा कार्यरत जीवन रोकायाले भने, अहिले पहिलेको भन्दा निकै सुधार देखिएको छ । अनुगमनका क्रममा ७ जना शिक्षक निगरानीमा थिए । उनीहरुलाई पालिकामा बोलाएर स्पष्टीकरण सोधेपछि अहिले नियमित छन् । पहिले मनलाग्दी बिदा बस्दा विद्यालयमा उपस्थिति निकै कम थियो । अहिले शिक्षकहरु प्रधानाध्यापकले बिदा स्वीकृत नगर्दासम्म बिदा बस्न पाउँदैनन् ।
कनकासुन्दरीले १० वर्षे शिक्षा रणनीति योजना बनाएको छ । यो वर्ष शिक्षा क्षेत्रमा विनियोजित २५ लाख रुपैयाँमा ७५ प्रतिशत बजेट क्षमता विकास तालिममा खर्चिएको छ । ७ वटा विद्यालयमा स्मार्टबोर्ड जडान गरिएको छ । ७ जना आईटी शिक्षक नियुक्त गरेको पालिकाले जनाएको छ । अहिले कनकासुन्दरीका शतप्रतिशत बालबालिका विद्यालयको पहुँचमा छन् । विद्यालयमा नियमित उपस्थिति रहेको विद्यालयहरूले जनाएका छन् । कनकासुन्दरी माविका पूर्वअध्यक्ष दीपेन्द्रप्रसाद उपाध्यायले प्रोत्साहनस्वरुप दिइएको भत्ताले राम्रो काम गरिरहेको बताए । उनले भने, शिक्षकले तलबभत्ता मात्रै पाइरहेका छन् । अन्य कुनै सुविधा पनि छैन । तर पालिकाले खाजा खर्च दिएर शिक्षकहरुको सम्मान गरेको छ ।
