सुर्खेत । कर्णालीमा बढ्दो सडक दुर्घटनाका न्यूनीकरणका लागि प्रहरीले ‘सुरक्षित यात्राका लागि स्मरण अभियान’ चलाइएको छ ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयका प्रवक्ता, प्रहरी निरीक्षक हरिबहादुर बिसीले दुर्घटना रोकथामका लागि उक्त अभियान चलाइएको बताए । कर्णाली प्रदेशमा हुने सवारी दुर्घटना न्यूनीकरण र सडक अनुशासन कायम राख्ने उद्देश्यले अभियान चलाइएको उनको भनाइ छ । अभियानको नारा ‘आफू पनि बचौँ र अरूलाई पनि बचाऔँ’ भन्ने राखिएको छ ।
बिहीबार मात्र प्रदेशका १० वटै जिल्ला ट्राफिक प्रहरी कार्यालय तथा मातहत अस्थायी ट्राफिक प्रहरी पोस्टहरूमा यो कार्यक्रम गरिएको छ । अभियान अन्तर्गत कर्णालीमा सवारी दुर्घटना हुने स्थानहरूमा भएका सवारी दुर्घटनाहरूका तस्बिरहरू प्रतिबिम्बित गराई सवारी चालक र सह–चालकहरूलाई सचेतना गराइन्छ ।
उनले अगाडि भने, ‘अहिलेसम्म ४७ स्थानहरूमा प्रदर्शन तथा सचेतना कार्यक्रम गरिएको छ ।’ उक्त कार्यक्रमबाट सवारी चालक तथा सह–चालक गरी जम्मा १ हजार २४३ जना लाभान्वित भएको उनको बिसीको भनाइ छ ।
