सुर्खेत। रुकुम पश्चिम आगलागीमा परेर एक वृद्धाको मृत्यु भएको छ। आइतबार दिउँसो बाँफिकोट गाउँपालिका ३ दारकाट्यामा ढारपाखा सामुदायिक वनबाट फैलिएको आगो गाउँमा पस्दा ७० वर्षीया बुदी कामीको मृत्यु भएको हो।
बाँफिकोट गाउँपालिका ३ का वडा अध्यक्ष तिलवीर केसीका अनुसार घरमा आगो सल्केपछि घरभित्र रहेका गहना निकाल्न भन्दै घरभित्र छिरेकी कामीको जलेर मृत्यु भएको हो। वन क्षेत्रबाट गाउँतर्फ फैलिएको आगोले ६ वटा घर जलेर नष्ट भएका छन्।
आगो नियन्त्रणमा लिनका लागी स्थानीयवासी र इलाका प्रहरी कार्यालय बाँफिकोटबाट गएको प्रहरी टोलीले आगलागी नियन्त्रणको प्रयास गरिरहेको छ।
आगलागीबाट थप घरमा समेत क्षति हुने अवस्था रहेकोछ। घरमा आगलागी हुँदा भएको क्षतीको विवरण भने सङ्कलन हुन सकेको छैन ।
