सुर्खेत । नेकपा (एकीकृत समाजवादी) का महासचिव तथा पूर्व कृषि मन्त्री घनश्याम भुसाल शुक्रबार जापानतर्फ प्रस्थान गरेका छन्।
आगामी आइतबार (अगस्ट ३१)टोकियोमा हुने प्रवासी नेपाली एकता मञ्च, जापानको तेस्रो राष्ट्रिय अधिवेशनमा सहभागी हुन उनी जापान गएका हुन्। अधिवेशनमा उनले प्रमुख अतिथिका रूपमा सम्बोधन गर्ने कार्यक्रम रहेको पार्टी स्रोतले जनाएको छ।
पत्रकार अमिर पाण्डेका अनुसार भुसाल थाई एयरवेजमार्फत बैंकक हुँदै जापान पुग्ने तय भएको छ। टोकियो आइपुगेपछि उनले विभिन्न प्रवासी नेपाली संघ–संस्था, पेशागत समूह र बौद्धिक समुदायसँग पनि भेटघाट तथा छलफल गर्ने तयारी भएको छ।
“महासचिव भुसालको यसपटकको जापान यात्रा केवल अधिवेशनमा उपस्थितिमात्र नभई प्रवासी नेपालीबीच संगठनलाई थप सुदृढ बनाउने सन्देश दिने अवसर पनि हो,” आयोजक समितिका संयोजक सञ्जय सिलवालले बताए।
यसैबीच, पार्टी पोलिटब्युरो सदस्य सुदेश पराजुली भने विशेष अतिथिका रूपमा सहभागी हुनका लागि अगस्ट २३ मै जापान पुगेका थिए।
अधिवेशन टोकियोको सिन–ओकुबोस्थित होटल सोलमारीको सभाकक्षमा हुनेछ। अधिवेशनले नयाँ नेतृत्व चयन गर्ने र प्रवासी नेपालीहरूको संगठनात्मक सशक्तिकरणका विषयमा रणनीति तय गर्ने तयारी गरेको छ।
