कालिकोट । नेकपा (एकीकृत समाजवादी) कालिकोटले सोमबार चौथो पार्टी स्थापना दिवस विविध कार्यक्रमसहित भव्य रुपमा मनाएको छ ।
पार्टी जिल्ला कार्यालय मान्ममा आयोजित विचार–अन्तरक्रिया कार्यक्रममा अग्रज नेता तथा संविधानसभा सदस्य तुलाराज बिष्ट प्रमुख अतिथि रहनुभएको थियो । उहाँले संबोधन गर्दै पुष्पलाल श्रेस्ठ र मदन भण्डारीले जस्तै दूरदर्शिता र वैचारिक स्पष्टता आजको अवस्थामा पार्टी नेतृत्वमा हुनु जरुरी रहेको धारणा व्यक्त गर्नुभयो । समाजवादी पार्टीको वैचारिक मार्गदर्शनले मात्र देशलाई सुशासन, समृद्धि र स्थिरता दिन सक्ने विश्वास व्यक्त गर्दै उहाँले गाउँ–गाउँमा संगठन सुदृढ पार्न नेता–कार्यकर्तालाई आह्वान गर्नुभयो ।
कार्यक्रमलाई सम्बोधन गर्दै पार्टी केन्द्रीय सदस्य एवम् जिल्ला सह–इन्चार्ज विजया बिष्टले अब कम्युनिष्ट शक्तिहरू एकजुट भई सर्वहारा वर्गको हितमा काम गर्नुपर्ने आवश्यकता औंल्याउनुभयो । उहाँले राष्ट्रियता र जनताको पक्षमा समाजवादी पार्टीले अझ सशक्त भूमिका खेल्नुपर्नेमा जोड दिनुभयो ।
खाँडाचक्र नगरपालिकाका प्रमुख कमलबहादुर शाहीले अब पार्टीलाई तहसनहस पार्ने प्रयास विफल भएको र संगठनलाई बलियो बनाउँदै जनलहर सिर्जना गर्ने अवसर आएको टिप्पणी गर्नुभयो ।
कार्यक्रमको अध्यक्षता गरेका पार्टी जिल्ला कमिटी अध्यक्ष चित्रसिंह गाउँलेले जिल्लाका ८२ वटै वडामा पार्टीलाई परिचालन गर्ने अभियान सुरु भएको जानकारी दिनुभयो । उहाँले एकीकृत समाजवादीले अँगालेको सिद्धान्तले बामपन्थी एकताको नयाँ बाटो खोलेको भन्दै पार्टीप्रति गाउँ–गाउँमा आकर्षण बढिरहेको दाबी गर्नुभयो ।
कार्यक्रममा पार्टी प्रदेश कमिटी सदस्य लालबहादुर मल्ल, उद्योग वाणिज्य संघ कालिकोटका अध्यक्ष रतनबहादुर शाही, वडा अध्यक्षहरू रंगलाल देवकोटा, विरजित बिष्ट र नन्द मल्ल, अनेमसंघ ९समाजवादी० जिल्ला अध्यक्ष पुष्पा सिंह शाही लगायतले आ–आफ्ना धारणा राखेका थिए । कार्यक्रमको सञ्चालन पार्टी सचिव कृष्णकला पाण्डेले गर्नुभएको थियो ।
यसैबीच, स्थापना दिवसकै अवसरमा जिल्लाका विभिन्न स्थानीय तहका पार्टी कमिटीहरूले समेत सामाजिक उत्तरदायित्वका कार्यक्रम सम्पन्न गरेका छन् । असहाय तथा विपन्न परिवारलाई सहयोग, अग्रज नेताहरूलाई सम्मान र स्थानीय स्तरमा जनचेतना कार्यक्रम सञ्चालन गरी पार्टीले स्थापना दिवसलाई जनमुखी बनाउन प्रयास गरेको जनाइएको छ ।
