कालीकोट । वर्षाका कारणले पहिरो जाँदा फेरी कर्णाली राजमार्ग पुर्ण अवरुद्ध भएको छ । बुधबार बेलुकी बाट परेको अविरल वर्षाले कर्णाली राजमार्गको कालीकोट खण्डमा पर्ने शुभकालिका- १ को एस मोड र गगनेखोलामा पहिरो जाँदा सडक अवरुद्ध भएको हो ।
पहिरोले कालीकोट खण्ड पुर्ण रुपमा बन्द हुँदा यात्रुलाई समस्या भएको छ । सडक सुचारु नहुन्जेल सुर्खेत नेपाल्गजबाट आउने र कालिकोट , जुम्ला मुगुबाट आउने यातायातका साधन थन्किने हुदाँ कालीकोट र अन्य जिल्ला, स्थानमा जाने यात्रु अलपत्र पर्ने भएका छन् ।
जिल्ला प्रहरी कार्यालय कालीकोटका सूचना अधिकारी गोविन्द चौधरीका अनुसार पहिरो गगने खोलामा भत्किएको छ भने एसमोडमा ढुङगा माटो सहितको पहिरो झरेको छ । चौधरीले सडकको अवस्था बुझेर मात्र यात्रा गर्न हुन अनुरोध समेत गर्नुभएको छ ।
जिल्ला ट्राफिक कार्यालय कालीकोटका प्रमुख प्रहरी सहायक निरीक्षक टोपबहादुर महताराले सबै भन्दा ठुलो पहिरो झरेको गगनेखोलामा मौसम सफा नहुन्जेल आजै सडकलाई सुचारु गराउन सकिन्छ भनेर भन्न सकिने अवस्थामा नरहेको बताउनुभयो । निरन्तर वर्षा भईरहेको हुदाँ गगनेखोलामा माथिबाट ठुलठुलो पहीरो खस्ने सम्भावना रहेको सो ठाँउमा तत्काल काम गर्ने अवस्था पनि नरहेको बताउनुभयो ।
सोही ठाँउमा बारम्बार पहीरोले सडक अवरुद्ध हुदा यात्रुले सास्ति भोग्नु परेको छ । गत सोमबार पहिरोका कारण अवरुद्ध राजमार्ग ५ दिनपछि संचालनमा आएको थियो ।अविरल वर्षाले कर्णाली राजमार्गको कालीकोट खण्डमा पर्ने शुभकालिका – १ को गगनेखोला, एसमोड सँगै खाडाचक्र – २ हुल्मवाजर, कालिकोट र दैलेख सिमाना दहिखोला र दैलेखको मालाचौरमा पहिरोले सडक पुर्ण रुपमा अवरुद्ध भएको थियो।
